ಮೂರನೇ ವಾರಕ್ಕೆ ಕಾಲಿಡುತ್ತಿದ್ದಂತೆ, ತಮ್ಮ ಮನಸ್ತಾಪಗಳು, ಭಾವನೆಗಳನ್ನು ಮುಚ್ಚು ಮರೆಯಿಲ್ಲದೆ ವ್ಯಕ್ತಪಡಿಸಲು ಎಲ್ಲರೂ ಹಾತೊರೆಯುವಂತೆ ಕಾಣುತ್ತಿತ್ತು.
ಇದಕ್ಕೆ ಅನುಗುಣವಾಗಿ ಬಿಗ್ ಬಾಸ್ ಎಲ್ಲರಿಗೂ ತಮಗೆ ಉಳಿದವರ ಮೇಲಿರುವ ದೂರುಗಳನ್ನು ಬರೆಯಲು ಅವಕಾಶ ಕೊಟ್ಟು, ಅದನ್ನು ಕ್ಯಾಪ್ಟನ್ ಆದ ಅಕುಲ್ ಓದುವಂತೆ ಆಗ್ರಹಿಸಿದರು. ಆರೋಪಿಯನ್ನು ಕಟಕಟೆಗೆ ಕರೆದು ನಂತರ ಆರೋಪ ಮಾಡಿದವರನ್ನು ಇನ್ನೊಂದು ಕಟಕಟೆಯಲ್ಲಿ ನಿಲ್ಲಿಸಿ , ಪ್ರಶ್ನೋತ್ತರ ರೀತಿಯಲ್ಲಿ ನಡೆಸಲಾಯಿತು.
ಮೊದಲನೇ ಆರೋಪಿಯಾಗಿ ಶ್ವೇತಾ ಅವರನ್ನು ಕರೆಯಲಾಯಿತು. ನಂತರ ನೀತು, ಅನುಪಮಾ ಮತ್ತು ಆದಿಯವರ ಮೇಲಿದ್ದ ಆರೋಪಗಳ ಬಾಗೆ ಚರ್ಚಿಸಲಾಯಿತು. ಮಯೂರ್ ತಮ್ಮನ್ನು ಮಾತನಾಡಿಸದೇ ಇರುವ ಆದಿಯ ಬಗ್ಗೆ ಸ್ವಲ್ಪ ಅಸಮಾಧಾನ ತೋರಿದರು. ನೀತು ಇವರಿಬ್ಬರ ನಡುವೆ ರಾಜಿ ಮಾಡಿಸುವ ಯತ್ನ ಮಾಡಿ ಹಲವು ಬಾರಿ ವಿಫಲರಾದರು. ದಿನದಂತ್ಯಕ್ಕೆ ಆದಿ ಮಯೂರ್ ಅನ್ನು ತಬ್ಬಿಕೊಂಡು ತಮ್ಮ ಸ್ನೇಹಕ್ಕೆ ಬೆಲೆ ಕೊಟ್ಟು ಪ್ರೀತಿಯ ಸ್ನೇಹಿತ ಮಯೂರ್ ಕೆನ್ನೆಗೆ ಮುತ್ತು ನೀಡಿ ಕ್ಷಮೆಯಾಚಿಸಿದರು.
ಸೃಜನ್ ಎಂದಿನಂತೆ ಎಲ್ಲರ ಅನುಕರಣೆ ಮಾಡಿ ಮನ ಗೆದ್ದರು. ಈ ವಾರ ಬಿಗ್ ಬಾಸ್ ಮನೆಯನ್ನು ಬಿಟ್ಟು ಹೋಗುವ ಸರದಿ ಶಕೀಲಾ ಅವರದಾಗಿತ್ತು. ಎಲ್ಲರಿಗೂ ಮಾರ್ಗದರ್ಶಕರಾಗಿದ್ದ ಚೆಚಿ , RJ ರೋಹಿತ್ ತಮಗೆ ತುಂಬಾ ಹಿಡಿಸುತ್ತಾರೆ, ಏಕೆಂದರೆ ಅವರು ನನ್ನನ್ನು ಅಕ್ಕಎಂದು ಮೊದಲು ಕರೆಯಲಿಲ್ಲ. ಆದರೆ, ನಂತರ ಅಕ್ಕ ಎಂದರೆ ನೀವು ಎಲ್ಲೇ ಇದ್ದರೂ , ನಿಮ್ಮ ಕಾಳಜಿ ವಹಿಸಬೇಕು ಇಲ್ಲದಿದ್ದರೆ ಅಕ್ಕ ಎಂದು ಕರೆಯುವಲ್ಲಿ ಏನು ಅರ್ಥವಿಲ್ಲ ಎಂದು ಹೇಳಿದಾಗ ನಮಗೆಲ್ಲಾ RJ ರೋಹಿತ್ ತುಂಬಾ ಹತ್ತಿರವಾದರು ಎಂದು ಭಾವಿಸುತ್ತೀವಿ.
ಸಕ್ಕತ್ ಸನ್ಡೇ ವಿತ್ ಸುದೀಪ್ ನ ವೇದಿಕೆಗೆ ಆಗಮಿಸಿದ್ದು, ರಾಷ್ಟ್ರ ಪ್ರಶಸ್ತಿ ವಿಜೇತೆ, ಖ್ಯಾತ ನಟಿ ತಾರಾ. ಅವರು ಕನ್ನಡ ಚಿತ್ರರಂಗದ ಎಲ್ಲ ದಿಗ್ಗಜರ ಜೊತೆ ಅಭಿನಯಿದ್ದಾರೆ. ಮೂರು ತಲೆಮಾರುಗಳ ನಾಯಕರ ಜೊತೆಯಲ್ಲಿ ಇವರು ನಟಿಸಿ ಹಲವಾರು ಪ್ರಶಸ್ತಿ ಮತ್ತು ಪ್ರಶಂಸೆ ಇವರದು.
ಅವರಲ್ಲಿ ಇರುವ ಕಾಯಕ ಭಕ್ತಿಯನ್ನು ನಮ್ಮ ಮುಂದಿಟ್ಟ ಸುದೀಪ್, ಅಂಬರೀಷ್ ಅವರ ಮಾತನಾಡುವ ಶೈಲಿ ಅನುಸರಿಸಿದಾಗ, ತಾರಾ ಅವರಿಗೂ ಕೂಡ ನಗು ತಡೆಯಲು ಆಗಲಿಲ್ಲ. ತಮ್ಮ ಮಗುವಿನ ಬಗ್ಗೆ ಮಾತನಾಡಲು ಕೇಳಿದಾಗ ಭಾವುಕರಾದ ತಾರಾ, ಅಂತ್ಯದಲ್ಲಿ ಅವರಿಗೆ ತುಂಬಾ ಹೆಸರು ತಂದುಕೊಟ್ಟ ರಣರಂಗ ಚಿತ್ರಗೀತೆಗೆ ಹೆಜ್ಜೆಇಟ್ಟು ರಂಜಿಸಿದರು.
ಸಕ್ಕತ್ ಸನ್ಡೇಯ ರಂಗು ಹೆಚ್ಚಿಸಲು ನಟ, ನಿರ್ದೇಶಕ ರಕ್ಷಿತ್ ಶೆಟ್ಟಿ ಮತ್ತು "ಉಳಿದವರು ಕಂಡಂತೆ" ಚಿತ್ರದ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ ವೇದಿಕೆ ಮೇಲಿದ್ದರು.
ಹುಲಿವೇಷ ಕುಣಿತಕ್ಕೆ ರಿಚಿ ಗೇಟ್ಅಪ್ನಲ್ಲಿ ಕುಣಿದ ರಕ್ಷಿತ್ ಗೆ ಸುದೀಪ್ ಕೂಡ ಸಾಥ್ ಕೊಟ್ಟರು. ಅಜನೀಶ್ ಮತ್ತು ರಕ್ಷಿತ್ ಇಬ್ಬರು ಸೇರಿ ಹಾಡು ಹೇಳಿ, ಅವರು ನಡೆದು ಬಂದ ಹಾದಿ ಮತ್ತು ಈಗ ಅವರಿಗೆ ಲಭಿಸಿರುವ ಸ್ಥಾನ ಮಾನಗಳ ವಿಚಾರ ವಿನಿಮಯ ಮಾಡಿಕೊಂಡರು.
ಮತ್ತೊಂದು ಭರ್ಜರಿ ಭಾನುವಾರಕ್ಕೆ ಕಾಯುವ ಸಮಯ ವೀಕ್ಷಕರದ್ದು.
No comments:
Post a Comment